【險變火人製泰式串燒，90後餐廳太子爺“下海”入廚誓救家族心血】

眼見屋企嘅泰國餐廳營運逐漸式微，Dale決定另覓出路，以餐廳師父嘅獨門食譜加以改良，並聯同幾位朋友創業，將泰式味道發揚光大。不過，入得廚房，又邊有咁易青靚白淨咁行翻出嚟吖？就好似Dale咁，試過喺製作串燒嘅過程中發生意外，火槍不慎漏氣，氣油𣊬間就瀉滿佢嘅手臂。然而好彩佢反應得切，即時撲熄啲火，如果唔係就差啲變成火人喇！
 

既然有個咁勇猛過人嘅經歷，都冇理由唔睇下Dale嘅苦心孤詣之作架！被問到自家產品嘅特別之處，Dale就充滿信心咁講係「完整」。佢補充，基本上，消費者一打開包裝就已經見到一件完整嘅產品，唔洗大費周章咁煮；而且，市場上同類型產品中，都未必會附送獨家醬料包，但自家產品就正正做到呢一點。

另外，Dale亦提到，雖然佢哋賣嘅係速食，但喺生產過程絕對不比平時嘅一餐飯馬虎，通常每包平均都會用到4-5個鐘。佢認為，佢哋所呈現俾客人嘅唔單止係一份食材咁簡單，個中烹調嘅手藝同用到嘅唔同工具，都代表住佢哋對產品嘅追求。

既然產品嘅時間成本咁長，點解佢哋唔考慮交俾外地嘅工場或者OEM（代工生產）做呢？Dale就認為，佢始終對於自己心目中嘅味道有種追求，擔心請代工工場可能會做唔岀自己想要嘅效果。而且，畢竟「香港製造」係世界級嘅金漆招牌，亦都係每個香港人心中嘅情意結，而佢哋亦非常欣賞「香港製造」嗰種講求改變同進步嘅態度，於是決志親身去做。

即食燒烤品牌Echoes90，顧名思義，代表住一班90後嘅創辦人，而Echoes就係希望佢哋嘅產品得到迴響。至此，「Echoes90」就成為咗呢幾位年輕人對於夢想嘅代名詞。佢哋憑藉住一腔熱血同盲目追求夢想嘅心創業，做好每一次嘅串燒，做好每一次嘅包裝，為嘅只係想得到令人感到驕傲滿意嘅答卷，證明小至自家品牌，大至「香港製造」都仍然係品質保證。

專訪由 SHOP4FREEDOM 提供